Walang ‘alibi’ sa integridad at delicadeza

0
88


LIDER Kuomintang man o Komunista, nagpakita ng integridad at delicadeza ang mga pangunahing lider ng China, sa Taiwan, sa Macau at sa Hong Kong sa gitna ng malalaking sakuna at disgrasya na labis na nakaapekto sa marami nilang mamamayan.

Una rito, nang magbitiw sa tungkulin ang Taiwanese minister matapos magkaaberya ang power plant na naging sanhi para mawalan ng elektrisidad ang 668,000 tahanan, tindahan at establisyemento sa Taiwan.

Dahil sa apat na oras na kawalan ng koryente, maraming mamamayan ang nakulong sa mga elevator, nabinbin sa trapiko at marami ang natigil sa kanilang ginagawa.

Nitong 15 Agosto 2017, dakong 4:50 pm, anim na yunit ng Datan Power Station sa Taoyuan, sa timog ng Taipei, ang biglang bumigay na naging sanhi nang biglang pagbagsak ng four million kilowatts ng elektrisidad.

Inako ni Economics Minister Lee Chih-kung ang responsibilidad sa insidente at agad naghain ng resignasyon kay Premier Lin Chuan, na agad tinanggap ng huli.

Isang linggo pagkatapos ng insidenteng ito, humingi ng paumanhin ang isang lider ng Macau, kasabay ng pagbibitiw ng kanilang weather chief matapos grabeng salantahin ng bagyong Hato ang kanilang bansa na nag-iwan ng walong casualty.x

Dahil sa lawak ng nasalanta, nagbitiw si Fong Soi-kun, ang director ng Macau Meteorological and Geophysical Bureau.

Inako ni Fong Soi-kun ang responsibilidad dahil hindi umano nila nabasa nang tama ang lakas ng bagyong Hato.

Bukod sa walong namatay, 200 tao ang sinabing nasaktan, at libo-libong tahanan ang nawalan ng elektrisidad at nawalan ng supply ng tubig.

Maging si Macau Chief Executive Fernando Chui Sai-on ay inamin na hindi handa ang kanyang administrasyon sa “catastrophic impact” ng nasabing bagyo.

Walang nagbitiw sa Hong Kong officials dahil wala silang tigil sa pagbibigay ng babala sa mga residente dahil nakita na nila ang malakas na bagyo.

Sa totoo lang, nakaiiyak makabalita nang ganito sa isang malaking bansa na magkakaiba ng political leanings pero nagkakaisa kapag delicadeza sa pamumuno at responsibilidad ang pinag-uusapan.

Ibig sabihin, nakaugat iyon sa kanilang kultura at pagmamahal sa bayan.

Malayong-malayo sa mga nakikita natin dito sa ating bansa.

Puro palpak na, panay pa ang depensa.

Hindi lang ‘yan, kung sino pa ang nagsisikap na gumawa nang tama, sila pa ang natatanggal sa puwesto.

Habang ‘yung mga sangkot sa iregularidad, sila pa ang malalakas ang loob na nag-aakusa at panay pormang Mr. Clean.

Ikula mo pa sa Perla, Mr. Clean para lalo ka pang pumuti.

Kailan kaya mai-internalize ng mga namumuno sa ating bansa ang ibig sabihin ng delicadeza, integridad at pagmamahal sa bayan?!

Tsk tsk tsk…

 

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected] Para sa mga nakaraang isyu ng BULABUGIN please visit http://www.hatawtabloid.com

 

BULABUGIN
ni Jerry Yap

 



All Credit Goes There : Source link

Comments

comments