‘Security lax’ dapat panagutan ng Resorts World Manila! (Casino tragedy)

0
78


MALAKING aral ang naganap na trahedya sa Resorts World Manila (RWM) nitong Biyernes para sa lahat, lalo na doon sa mga nalululong sa casino.

Dapat pong isipin ng mga nagka-casino na hindi ‘yan balon ng suwerte at yaman.

Ang casino ay isang lugar na libangan ng mga may kakayahang maglibang sa lugar na ‘yan.

Mayroong mayayabang na nagsasabing sa casino sila kumukuha ng pamalengke, pang-grocery at pambili ng mga pampormang signature apparel.

Pero sa totoo lang, kalokohan ‘yan.

Puwede bang magpatalo ang mga casino na yan!?

Siyempre bawat araw, ang interes ng mga casino ay kumita.

Kung mayroon mang isang sinuwerteng nanalo, na ‘yan naman ang gusto ng casino para balik-balikan sila ‘e tiyak mayroong mahigit sa 1000 players o higit pa ang natalo.

Pero ang higit na dapat na maging aral dito at hindi dapat malimutan — very lax sa kanilang seguridad ang Resorts World Manila.

At very lax na nga sa seguridad, lumalabas pa na hindi kasado o walang crisis management ang casino na ito!

Sonabagan!!!

Sa CCTV camera, kitang-kita kung gaano ka-desperado sa kanyang mga kilos ang suspek na ngayon ay kilala nang si Jessie Javier Carlos, 42 anyos, isang hi-roller player noon pero nalulong sa casino at sabong kaya nalubog sa utang.

Kung mayroong nagmo-monitor sa CCTV camera kung ano ang mga naging aksiyon ni Carlos, pagpasok na pagpasok sa casino, masasabi nating hindi magiging ganyan kalala ang insidente.

Sana, doon pa lamang ay nakagawa na ng kaukulang hakbang ang RW security force. Mantakin ninyong habulin ng lady security guard nang hindi dumaan sa security scanner si Carlos?! Hindi ba niya naisip kung gaano ka-delikado ang kanyang ginawa?!

Wattafak!

Kung tutuusin, makikita na unruly na si Carlos at mukhang buo na talaga sa kanyang isip kung ano ang kanyang mga gagawin.

Ang  kawalan  ng ‘crisis management’  sa  kampo ng Resorts World Manila ay lalong nagpaigting sa mga plano ni Carlos at nagbigay sa kanya ng lakas ng loob para ituloy-tuloy ang karahasan.

Kung nakitaan ni Carlos, ang management ng Resorts World Manila na nakahandang ipagtanggol ang kanilang customers at mga empleyado, malamang noon pa lang ay pinanghinaan na ng loob ang suspek.

Pero dahil sa maluwag na seguridad (na mas una yatang inabatan ang cash at chips) buong-buo ang loob ni Carlos na isagawa ang kanyang mga plano.

Hindi maitatangging desperado sa buhay si Carlos. At sa kanyang ginawa, lumalabas na naghanap siya ng damay.

At nagtagumpay siya, marami siyang nai-damay, 37 ang namatay sa kanyang panununog at 78 ang sugatan sa stampede at barilan.

On national TV, nangako si RWM chief operating officer, Stephen Reilly, na babalikatin nila ang gastusin sa burol ng mga nasawi.

Pero hanggang kahapon, nag-iiyakan pa rin ang mga kamag-anak ng mga biktima sa Funeraria Rizal at Funeraria Veronica, dahil isang araw na ang nakalipas, hindi pa rin nila nakukuha ang bangkay ng kanilang mga kamag-anak.

Ayaw kasing ibigay ng Funeraria Rizal at Funeraria Veronica dahil wala pa raw ibinibigay na commitment ang Resorts World Manila.

Sonabagan!

Mamigay nga kaya ng tig-P1-milyon sa mga biktima ang RWM gaya ng kanilang pangako, gayong sa burol pa lamang ng mga biktima, ay tila nagdadalawang-isip sila?!

Pero sa isang banda, hindi lang ito usapin ng pera, mayroong malalang paglabag ang RWM, at iyon ang dapat nilang panagutan!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit http://www.hatawtabloid.com

BULABUGIN
ni Jerry Yap



All Credit Goes There : Source link

Comments

comments